會員心聲-皇上

一。 處男下海

五年前的一天在公司的Gym room,看見幾個大隻佬在玩室內划艇機,每拉一下,那索帶便”轟”的一聲卷動,很有力量感。
“喂,唔好睇啦,過來試下啦”
說這句話的(不用說也知道…),正是財哥。 就由這句話開始,我的生活起了變化。
“星期日得唔得閒,我地龍舟練水,黎玩下啦”
“嘩! 龍舟? 唔係掛,大隻佬先玩架bor,我咁瘦,點玩呀”
“唔怕,你手長腳長,劃幅大,練練下就得架啦”
“咁呀…” (係咪坤我架…)
“唔洗咁啦,你住馬鞍山,星期日八點半樓下等,順路車埋你囉。”
“咁… 我試下啦”。
“處男”… 正式下海了。

二。 扒龍舟

第一次上龍舟,看看船裏的人,真的很大隻,胸肌四十吋,有點擔心自己扒不扒得來。 財哥走過來,說了一遍扒一槳的步驟:
“上手曲下手直,槳入水蹬腳轉腰鬆肘,到腰向上抽起槳再預備下一槳,好簡單架咋”
“陷…陷…” 財哥每拉一槳,便有一舊水“陷” “陷”聲向後,水呀!! 好大舊水呀!!! 好有power呀!!!
哦… 原來咁樣扒就得架啦。 等我試下先…。
“時… 時…”
水聲小得可憐… 死啦,比晒力架啦bor,點解拉水無聲既?
“跟下先啦,慢慢就得架啦”
就係咁,跟下跟下,就跟左五年了。
起初練完水,第日番工真係想死,手又痛腰又痛,最慘就係”羅有”痛,男人最痛算這種 (所以下次拿拿林帶海綿墊坐)。
由初初扒到手軟,慢慢可以用多d腰腿,手開始無咁?。 拉水亦開始有少少“陷” “陷”聲。 除了注意自己姿勢,也留心跟著前面,慕求做到快頻大拉都跟到。


三。 由縮骨到頂硬上

聽到佢地話會去台灣比賽。 ?? 唔係掛,自己岩岩學,點敢去呀,賽程都扒唔到咪累街坊。 都林左好耐。 但又心林,我未去過台灣,到時唔落水咪當旅行囉。 (我當時太天真了,去得,財哥點會唔叫你落水。)
其實我當初真係抱住咁既心態,自己扒最後果欄,勉強捱完賽程已經交足功課,如果有其他隊員,落唔落我都無所謂,好想縮。
但經過台灣比賽及之後數個賽事,發覺有時贏輸只係零點幾秒,差個龍頭,如果每個人都比多少少就贏架啦。
“一係就唔扒,落得水就比很晒佢。” “你唔比力就要兄弟扒埋你果份” “唔好輸比自己”… 依d係d師兄成日用黎勉勵大家既說話。
當我聽到依d說話,我開始唔想累街坊。 每次練習我都盡量出席,當時還有到運動場跑步及練划艇機,體能真的提升了,甚至有機會帶頭。 其實自知未夠班,不過當時我心態已變,不再縮骨,自我界限不斷的越過,扒頭? 未驚過。 就算扒得唔好都照頂硬上,只要肯做肯試,一定會做得好的。 扒龍舟令我性格也改變了。

四。 無”為”而無所不”為”

有時我會問自己,“為”什麼每個星期都抽咁多時間練水,點解搞到周身痛都要繼續keep住。
為溝女? 幾年前可能係,依家…
為大隻? 做Gym有效d。
為磨練意志? 跑步咪得囉。
為識朋友? 上網快d。
咁一定為lo槳牌啦! 唔… 開始有d近… 但又唔係完全arm。 依幾年自由龍係香港及外地比賽,總會lou到d槳,槳牌,記念品都有成箱。 對住d牌唔會好開心,最開心既係林番點樣lo到果d牌。 記得有一次係城門河,同隔離隊差唔多一樣快,半路已經要起身,到終點前50米癐到好想坐番落去,但係見到身邊d兄弟個個都咬緊牙筋,發狂咁哎晒出黎,突然間,覺得自己小宇宙開始燃燒,我唔可以要我d兄弟扒埋我果份,我唔可以因為我坐番係到而令隻船慢左半秒,我唔可以因為我而令到d兄弟?唔到牌,所以我無坐底。 吸啖氣,博晒老命咁同隊友一齊扒過終點。最後贏了,不只是贏了比賽,而是贏了自己。

不過,如果你問我扒龍舟是不是因為想贏自己,我又會答你不是。 凡事有兩面,贏有輸的隱性在背後,一心林住要贏,輸了便會受很大打擊,甚至會埋怨自己,埋怨別人,就算贏了,也只開心很短時間便又想再贏。 一份興趣不應該是這樣的,不應對勝負看得太重,當一條船每個人都做出準確的姿勢,由起步、中段、衝線,都發揮出整體性、合作性、力量、拼勁,每個人上水都說拉得好、有火,那贏了或輸了,重要嗎? 這樣說可能清高了點,但至少我是這樣認為。

五。人情味

我未入自由龍之前,做過青年中心義工,玩過話劇社,但都係唔長,兩三年就完。 點解到今日仲keep住扒龍舟? 你估真係前世未辛苦過咩。 其中一個keep住既原因,就係自由龍的… 人。
第一個,財哥。 他對龍舟很有心,搞比賽,搞旅行,勞心勞力,又無錢收,憑的,就是對龍舟運動的熱誠。 而且,他對每個隊員都好重視,有時見你好耐無練水,專登打電話黎問你有無事呀,做乜唔練水呀。 我今天還在自由龍,其中一大原因是因為財哥。
還有亞俊亞達,他們有時也很疲倦,但一要同人砌船,便死都死埋佢,我慢慢也感染到那種天不怕地不怕的氣概,“憑傲氣,硬漢子,拼出一生痴…” 現在他們真的做了”真的漢子”,當差了 (我差點也報考呢…)
不可不提的,還有這幾年來我心目中自由龍的骨幹成員,每次練水比賽吃飯,男女老少,老中青幼聚首一堂,很有大家庭的感覺,而我,很慶幸能成為當中一份子。
近來,有不少新人加入自由龍, 他們有青春, 有拼勁, 很希望新人舊人很快便融為一體, 成為龍裏一家人。
總之,扒龍舟,是為了贏比賽、贏自己,是為了識朋友,是為了練大隻,是為了磨練意志… 我不只是”為”了一樣野而扒,而是無所不”為”,以至扒龍舟令我在生活中的每個範疇也有得著,亦希望龍舟能令你得到滿足。

共勉之。
皇上 Kent
2010年7月

 

大孖

細孖

 

返回頁首